நோயற்ற வாழ்வே குறைவற்ற செல்வம்
முன்னுரை
நாம் கல்வியில் முதல் இடத்தில் இருந்தாலும் உடல் நலத்தோடு நீண்ட ஆயுளுடன் வாழ்வது முக்கியமாகும். உடல் நலத்துடன் கூடிய வாழ்வு பல கோடி மதிப்புடைய சொத்துக்கு சமமானதாகும். அவ்விதம் நோயற்ற வாழ்வினை வாழ நாம் செய்ய வேண்டியவற்றைப் பற்றி இக்கட்டுரையில் காண்போம்.
நோய் வரக் காரணங்கள்:
இன்றைய வாழ்க்கைச் சூழலில் ஓய்வின்மை, தவறிய உணவு, உணவுப் பழக்கவழக்க மாற்றம் உள்ளிட்டவையை பல்வேறு உடல் நலப் பாதிப்புகளுக்குக் காரணமாகும். துரித உணவுக் கலாச்சாரத்தில் மூழ்கியதே பல நோய்கள் வருவதற்குக் காரணம். மாசு நிறைந்த சுற்றுச்சூழல் நோய்க்குக் காரணமாகின்றது. இயற்கை வேளாண்மையை மறந்து நல்ல விளைச்சல் வேண்டி நவீன உரங்களையும் பூச்சிக்கொல்லி மருந்துகளையும் பயன்படுத்தி நிலத்தை மாசுபடுத்திவிட்டோம். இவ்வகை உணவினால் நோய்கள் அணுகுவதற்கு நாமே காரணமாகி விட்டோம்.
நோய் தீர்க்கும் வழிமுறைகள்
நாம் உண்ணும் உணவின் அளவை அறிந்து உண்ணுவது, சரியான உடற்பயிற்சி மேற்கொள்வது, நம் சுற்றுப்புறத்தைத் தூய்மையாக வைத்துக் கொள்வது, நோயின் நிலை அறிந்து அதற்கேற்ற உணவையும் மருந்துகளையும் உட்கொள்வது போன்றவை நோயைத் தீர்க்கும் வழிமுறைகள் ஆகும். சுற்றுச்சூழலைப் பாதுகாப்பது அவசியம். அப்போதுதான் நோய்கள் நம்மை அணுகாது. வீட்டின் உள்ளேயும் வீட்டைச் சுற்றியும் சுத்தத்தைப் பேண வேண்டும். ஈ, கொசு போன்றவை நம் வீட்டை அண்டாதவாறு பார்த்துக் கொள்ள வேண்டும்.
வருமுன் காத்தல்
பருவநிலைகள் மாறும்போது அதற்கேற்ற உணவுகளை உண்ணுதல் அவசியம். கோடைகாலத்தில் பழச்சாறுகளை அருந்தலாம். மழைக்காலத்தில் சளிப் பிடிக்காமல் இருக்கவும் காய்ச்சல் வராமல் இருக்கவும் நம் தமிழ் மருத்துவ முறைகளை அறிந்து அவற்றைப் பின்பற்றுதல் வேண்டும். சிறுவர்களுக்கான ஆரோக்கிய உணவுகளை அறிந்து அவற்றைக் கொடுக்கவேண்டும். "நோய்நாடி நோய்முதல் நாடி" என்ற வள்ளுவரின் வாக்கின்படி, நோயை அறிந்து அவை முதிர்ந்து நம்மை துன்புறுத்துவதற்கு முன் அந்நோயை முளையிலேயே கிள்ளி விட வேண்டும்.
உணவும் மருந்தும்
உணவு வகைகளே நமது உடல் நலத்திற்கு அடிப்படை என்று கூறினால் அது மிகையாகாது. உணவைத் தகுந்த நேரத்தில், ஏற்ற அளவில் உட்கொள்ள வேண்டும். காலை உணவைத் தவிர்த்தல் கூடாது. இரவெல்லாம் வெற்றுக் குடலுடன் இருந்த உடலுக்கு குளிர்ச்சியான உணவு மிகவும் நல்லது. மதிய உணவில் காய்கறிகள், கீரைகள் ஆகியவற்றை அதிக அளவு சேர்த்துக் கொள்ளவேண்டும். அரிசி உணவை அளவாக உண்ண வேண்டும். மிகுதியான காரத்தையும் உப்பையும் தகர்க்க வேண்டும். இரவு எளிமையான உணவு எடுத்துக்கொள்ள வேண்டும். இவையே உடலைப் பேணும் வழிமுறைகள் ஆகும்.
உடற்பயிற்சியின் தேவை
நாம் நோயின்றி வாழ உடற்பயிற்சி மிகவும் இன்றியமையாதது. "ஓடி விளையாடு பாப்பா... நீ ஓய்ந்திருக்கலாகாது பாப்பா" என்று பாடிய பாரதியார் உடற்பயிற்சியைச் சிறுவயது முதலே அனைவரும் செய்ய வேண்டும் என்று கூறுகிறார். நாம் தினமும் உடற்பயிற்சி செய்து வந்தால் உடல் சுறுசுறுப்புடனும் மூளை புத்துணர்ச்சியுடனும் காணப்படும். உடற்பயிற்சி பல நோய்களிலிருந்து விடுவிக்கும் ஆற்றலைப் பெற்றுள்ளது என்பதே அறிவியல் கண்ட உண்மையாகும். இதனைக் கவிமணி, "காலை மாலை உலாவி நிதம் காற்று வாங்கி வருவோரின் காலைத் தொட்டுக் கும்பிட்டுக் காலன் ஒடிப் போவானே" என்கிறார்.
முடிவுரை
நோயற்ற வாழ்விற்கு சுகாதாரம் அவசியம். அரிது அரிது மானிடராய் பிறத்தல் அரிது என்ற ஔவையாரின் வாக்குப்படி நமக்கு கிடைத்த இவ்வுடலை நோயின்றிப் பேணுவது நம் கடமையாகும்.
கருத்துகள் இல்லை:
கருத்துரையிடுக